CHMS mellorará o saneamento do municipio ourensán da Rúa cun investimento de 265.000€

Detalles

Xoves, 05 Febreiro 2026

• "As obras consistirán na construción das infraestruturas de saneamento necesarias para dar servizo á zona das antigas adegas A Pinguela, situadas en ambas as marxes de Regacho da Rúa" explicou o presidente.
• "Actuacións de saneamento que contribuirán a poñer en valor unhas antigas edificacións en desuso que, pola súa singularidade, están incluídas no catálogo de elementos patrimoniais de Galicia” indicou a alcaldesa.
• CHMS achegará o 95% e o Concello o 5% restante.

José Antonio Quiroga, presidente da Confederación Hidrográfica do Miño-Sil (CHMS), organismo autónomo dependente do Ministerio para a Transición Ecolóxica e o Reto Demográfico, e a alcaldesa da Rúa (Ourense), María González Albert, rubricaron esta mañá o Convenio de colaboración que posibilitará melloras no sistema de saneamento do municipio.

O presente convenio ten por obxecto determinar as condicións para a colaboración entre as partes outorgantes para o financiamento e execución das obras.

As obras consistirán na construción do colector de saneamento para dar servizo ás antigas adegas situadas en ambas as marxes da canle, para a súa conexión, mediante bombeo, á rede municipal.

Unha vez finalizadas e recibidas as obras por parte da Confederación Hidrográfica do Miño-Sil, comunicarase ao Concello da Rúa tal circunstancia, anexando unha copia da acta de recepción, sendo entregadas para a súa xestión, mantemento e conservación.

O investimento total necesario estímase en 265.000 €, que serán sufragados nun 95% pola Confederación Hidrográfica do Miño-Sil e o 5% restante polo Concello.

"As obras consistirán na construción das infraestruturas de saneamento necesarias para dar servizo á zona das antigas adegas A Pinguela, situadas en ambas as marxes de Regacho da Rúa, coas que se conseguirá evitar as verteduras incontroladas ao medio natural" explicou o presidente.

"Actuacións de saneamento que contribuirán a poñer en valor unhas antigas edificacións en desuso que, pola súa singularidade, están incluídas no catálogo de elementos patrimoniais de Galicia" indicou a alcaldesa.

"A colaboración entre Administracións é clave para avanzar en proxectos que valoricen a nosa riqueza natural e patrimonial e que melloren e preserven o medio ambiente, para un desenvolvemento máis sostible", concluíu o presidente.

Descargar PDF